തവനൂര്: മലപ്പുറത്ത് വീണ്ടും വി ഡി സതീശനെ അനുകൂലിച്ച് ഫ്ലക്സ് ബോര്ഡ്.കേരളത്തിന്റെ നിയുക്ത മുഖ്യമന്ത്രി വി ഡി സതീശന് അഭിവാദ്യങ്ങള് എന്നാണ് ഫ്ലക്സില് എഴുതിയിട്ടുള്ളത്. തവനൂര് മണ്ഡലത്തിലെ തൃപ്രങ്ങോട് പെരുന്തലൂര് ഭാഗത്താണ് ഫ്ലക്സ് പ്രത്യക്ഷപ്പെട്ടത്. നേരത്തെ തവനൂര് പാറപ്പുറത്തും ഫ്ലക്സ് സ്ഥാപിച്ചിരുന്നു. യൂത്ത് ലീഗ് പ്രവര്ത്തകനായിരുന്നു അവിടെ ഫ്ളക്സ് സ്ഥാപിച്ചിരുന്നത്. ഫ്ളക്സിനെതിരെ കോണ്ഗ്രസിലെ ഒരു വിഭാഗം പരാതി ഉന്നയിച്ചിരുന്നു.
മുഖ്യമന്ത്രി സ്ഥാനത്തേയ്ക്ക് വി ഡി സതീശനെ അനുകൂലിച്ച് കണ്ണൂരിലും ഫ്ലക്സ് ബോര്ഡുകള് പ്രത്യക്ഷപ്പെട്ടിരുന്നു. നിയുക്ത മുഖ്യമന്ത്രി വി ഡി സതീശന് അഭിവാദ്യങ്ങള് എന്നായിരുന്നു ഫ്ലക്സിലെ വാചകം. മാടായി കൂട്ടായ്മ എന്ന പേരില് പഴയങ്ങാടിയിലെ ബീവി റോഡിലാണ് ഫ്ലക്സ് ബോര്ഡുകള് സ്ഥാപിച്ചിരിക്കുന്നത്.
വോട്ടെടുപ്പ് കഴിഞ്ഞതിന് പിന്നാലെയായിരുന്നു കോണ്ഗ്രസില് മുഖ്യമന്ത്രി പദവുമായി ബന്ധപ്പെട്ട ചര്ച്ചകള് ഉടലെടുത്തത്. മുഹമ്മദ് ഷിയാസായിരുന്നു ചര്ച്ചകള്ക്ക് തുടക്കം കുറിച്ചത്. ആദ്യഘട്ടത്തില് ആരോഗ്യപരമായ ചര്ച്ചകളായിരുന്നു എങ്കില് അത് പിന്നീട് നേതാക്കളെ അധിക്ഷേപിക്കുന്ന തലത്തിലേക്ക് മാറുകയായിരുന്നു.
അതേസമയം, കോണ്ഗ്രസിലെ മുഖ്യമന്ത്രി ചര്ച്ചകള് പരിധി വിട്ടുവെന്നാണ് ഹൈക്കമാന്ഡിന്റെ വിലയിരുത്തല്. സമൂഹ മാധ്യമങ്ങളിലെ പ്രചാരണങ്ങള് കര്ശനമായി നിയന്ത്രിക്കാന് കെപിസിസിക്ക് ഹൈക്കമാന്ഡ് നിര്ദേശം നല്കിയിട്ടുണ്ട്. മുഖ്യമന്ത്രി ചര്ച്ചകളില് ഘടക കക്ഷികള് അതൃപ്തി പ്രകടിപ്പിച്ചതോടെയാണ് ഹൈക്കമാന്ഡ് ഇടപെട്ടത്.
Content Highlights: Flex Board for VD Satheesan in Malappuram again